Latest Post

வினா: நோன்பு பிடிக்க முடியாத வயதானவர்கள் ஒவ்வொரு நோன்பிற்கும் பதிலாக ஒரு ஏழைக்கு உணவளிக்க வேண்டும் என்று கூறுகின்றார்களே ! இது சரியானதுதானா.?   

விடை:
''அல்லாஹ் எந்த ஓர் ஆத்மாவையும் அதன் சக்திக்கு அப்பால் கஷ்டப்படுத்தமாட்டான்'' (சூறா அல் - பகறா 286)

எனவே நோன்பு பிடிக்க சக்தியற்ற முதியவர்கள் நோன்பை பிடிக்கமாட்டார்கள். அதற்கு பதிலாக ஒரு நாளைக்கு ஒரு ஏழைக்கு உணவளிக்க வேண்டும் என்று நபி (ஸல்) அவர்களைத் தொட்டும் எந்த ஒரு ஆதாரமான ஹதீஸ்களும் வரவும் இல்லை.

ஒருவர் தனக்கு கடமையான ஒன்றைவிட்டால் அதற்கு பிராயச்சித்தம் செய்யலாம். நோன்பு பிடிக்க சக்தியே இல்லாத முதியவர் அவருக்கு நோன்பு கடமை இல்லை. எனவே தன் மீது கடமை இல்லாத ஒன்றைச் செய்யாததனால் அதற்குப் பிராயச் சித்தமாக ஆகாரம் வழங்க வேண்டும் என்பது அர்த்தமற்ற வாதமாகும்.

எனவே நோன்பு நோற்க சக்தி இல்லாத முதியவர்கள் கழாச் செய்வதோ, ஆகாரம் வழங்குவதோ கடமை இல்லை.
வயதான முதியவர்களுக்கு ஐவேளை தொழுகை இறுதிவரை கடமையாக உள்ளதால் அதே போன்று நோன்பு கடமையானதாக இருக்கலாம் தானே என்று சிலர் கேட்கலாம்.

தொழுகையைப் பொறுத்தவரை பருவமடைந்த அனைவரும் எல்லா நிலையிலும் எப்போதும் தொழ வேண்டும். அவர்கள் அவர்களின் சக்திக்கேற்ப நின்றோ, இருந்தோ, சாய்ந்தோ தொழுவார்கள் என்பதற்கான ஆதாரங்கள் நிறைந்துள்ளது.

ஆனால் ஸகாத், ஹஜ், நோன்பு இது மூன்றும் அனைவருக்கும் கடமையானது அல்ல. இவ் ஒவ்வொன்றிற்கும் அதனைச் செய்வதற்கென சக்தியை அவன் பெற்றால் தான் அவன் மீது கடமையாகும். அந்த சக்தியைப் பெறாதவருக்கு இவைகள் கடமையாகமாட்டாது.

எனவே தொழுகையோடு ஒப்பிட்டு கியாஸ் என்ற அடிப்படையில் நோன்பிற்கும் அதே சட்டத்தை கொடுக்கக் கூடாது.
 
                                                                     T.S.A. அரபிக் கல்லூரி மாணவிகள்

அதிக நன்மைகளை நாடி பிரயாணம் மேற்கொள்வதற்கு இஸ்லாம் அனுமதி வழங்கிய உலகின் சிறப்பு மிக்க மூன்று புனிதத் தளங்களில் ஒன்றாக பாலஸ்தீனத்தில் அமைந்துள்ள மஸ்ஜிதுல் அக்ஸா காணப்படுகின்றது. (அதிக நன்மையை நாடி) மூன்று பள்ளிவாசல்கள் தவிர வேறு பள்ளிகளுக்குப் பிரயாணம் மேற்கொள்ளக் கூடாது. அவைகளாவன: மஸ்ஜிதுல் ஹராம், எனது பள்ளி (மஸ்ஜிதுன்னபவீ), மஸ்ஜிதுல் அக்ஸா என நபிகள் நாயகம் (ஸல்) கூறியுள்ளனர். அறிவிப்பவர்: அபூஸயீத் (ரலி),  நூல்: புகாரி 1189, 1197, 1864, 1996 

பருவ வயது வந்த, ஒவ்வொரு ஆண், பெண்ணின் மீதும் இந்த ரமலான் நோன்பு கடமையாகிறது.

பெண்கள் தனது மாதவிடாய் காலத்தில் நோன்பு பிடிப்பதை தடை செய்து, ரமலான் அல்லாத காலத்தில் ரமலானில் விட்ட நோன்புகளை களா செய்யும் படி இஸ்லாம் வழிக் காட்டுகிறது.அது போல ரமலான் காலத்தில் சுகயீனம் காரணமாக, அல்லது பயணம் காரணமாக அல்லது ஏதோ ஒரு காரணத்தால் நோன்பை நோற்க முடியா விட்டால், ரமலான் அல்லாத காலத்தில் அதை நிறை வேற்ற வேண்டும். 

சில சந்தர்ப்பங்களில் களா நோன்பை நிறைவேற்றவதற்கு முன் மரணித்து விட்டால், அந்த களா நோன்புகளை மரணித்தவரின் குடும்பத்தார்கள் நிறைவேற்ற வேண்டும். அதன் மூலமாக மரணித்தவரின் கடமை நிறை வேற்றப்படுகிறது என்பதை புரிந்து கொள்ள வேண்டும்.

அது சம்பந்தமான ஹதீஸ்களை கவனியுங்கள்.

இறைத்தூதர்(ஸல்) அவர்கள் கூறினார்கள்: 'களாவான நோன்புள்ள நிலையில் ஒருவர் இறந்துவிட்டால் அவர் சார்பாக அவரின் பொறுப்பாளர் நோன்பு நோற்பார்.' என ஆயிஷா(ரலி) அறிவித்தார். (புகாரி 1952)

மேலும்“ இப்னு அப்பாஸ்(ரலி) அறிவித்தார். ஒருவர் நபி(ஸல்) அவர்களிடம் வந்து, 'இறைத்தூதர் அவர்களே! என் தாயாருக்கு ஒரு மாத நோன்பு கடமையாகியிருந்த நிலையில் மரணித்துவிட்டார். அவர் சார்பாக அதை நான் நிறைவேற்றலாமா?' என்று கேட்டதற்கு நபி(ஸல்) அவர்கள், 'ஆம்! அல்லாஹ்வின் கடன் நிறை வேற்றப்படுவதற்கு அதிகத் தகுதி படைத்தது' என்றார்கள்.
இப்னு அப்பாஸ்(ரலி) அறிவிக்கும் மற்றோர் அறிவிப்பில், ஒரு பெண்மணி நபி(ஸல்) அவர்களிடம் வந்து, 'என் சகோதரி மரணித்துவிட்டார்...' என்று கூறினார்கள் என இந்த ஹதீஸ் துவங்குகிறது.

இப்னு அப்பாஸ்(ரலி) அறிவிக்கும் இன்னொரு அறிவிப்பில் ஒரு பெண்மணி நபி(ஸல்) அவர்களிடம் வந்து, 'என் தாய் இறந்துவிட்டார்...' என்று கூறினார்கள் என இந்த ஹதீஸ் துவங்குகிறது.

இப்னு அப்பாஸ்(ரலி) அறிவிக்கும் மற்றோர் அறிவிப்பில், 'நேர்ச்சை நோன்பு என் தாயாருக்குக் கடமையாக இருந்த நிலையில் என் தாய் இறந்துவிட்டார்...' என்று ஒரு பெண்மணி நபி(ஸல்) அவர்களிடம் கூறினார்கள் என இந்த ஹதீஸ் துவங்குகிறது.

இப்னு அப்பாஸ்(ரலி) அறிவிக்கும் இன்னொரு அறிவிப்பில், 'என் தாய் மீது பதினைந்து நோன்புகள் கடமையாக இருந்த நிலையில் இறந்துவிட்டார்' என்று ஒரு பெண்மணி நபி(ஸல்) அவர்களிடம் கூறினார்கள் என இந்த ஹதீஸ் துவங்குகிறது.(புகாரி 1953)

எனவே யாருக்கு எத்தனை பர்ளான நோன்புகளோ அல்லது நேர்ச்சை நோன்புகளோ விடுப்படுகிறதோ அவர் கட்டாயமாக ஒரு டயரியில் இத்தனை நோன்புகள் நான் பிடிக்க வேண்டியுள்ளது என்று எழுதி வைத்துக் கொள்ள வேண்டும்.

அப்போது தான் சம்பந்தப்பட்டவர் மரணித்தாலும் அவரது குடும்பத்தார்கள் அதை நிறைவேற்றுவதற்கு பொருத்தமாக இருக்கும் என்பதை விளங்கிக் கொள்ள வேண்டும்.

                                                                        மௌலவி யூனுஸ் தப்ரீஸ்.



நாம் பயணம் செய்யும் போது விரும்பினால் நோன்பை நோற்ற நிலையில் பயணம் செல்லலாம். இல்லா விட்டால் நோன்பை நோற்காமல் விட்டு, விட்டு ரமலானுக்கு பிறகு அந்த நோன்பை களா செய்யலாம்.

“ஜாபிர் இப்னு அப்தில்லாஹ்(ரஹ்) அவர்கள் அறிவித்தார். நபி(ஸல்) அவர்கள் ஒரு பயணத்தில் இருந்தபோது, ஒருவர் நிழலில் தங்க வைக்கப்பட்டு மக்கள் (அவரைச் சுற்றிலும்) குழுமியிருந்ததைக் கண்டார்கள். 'இவருக்கு என்ன நேர்ந்தது?' என்று கேட்டார்கள். 'இவர் நோன்பு நோற்றிருக்கிறார்!' என்று மக்கள் கூறினார்கள். அப்போது நபி(ஸல்) அவர்கள் '(பலவீனமான நிலையில் உள்ளவர்கள்) பயணத்தில் நோன்பு நோற்பது நற்செயலில் சேராது!' என்று கூறினார்கள். (புகாரி 1946)

மேலும் “ அனஸ் இப்னு மாலிக்(ரலி) அறிவித்தார். நாங்கள் நபி(ஸல்) அவர்களுடன் பயணத்தில் செல்வோம். நோன்பு நோற்றவரை நோற்காதவரும் நேற்காதவரை நோற்றவரும் குறை கூறமாட்டார்கள். ( புகாரி 1947)

மேலும் “ இப்னு அப்பாஸ்(ரலி) அறிவித்தார். 'நபி(ஸல்) அவர்கள் மதீனாவிலிருந்து மக்காவிற்குப் புறப்பட்டார்கள். அப்போது அவர்கள் நோன்பு வைத்திருந்தார்கள். உஸ்பான் எனும் இடத்தை அடைந்ததும் தண்ணீர் கொண்டுவரச் செய்து, மக்கள் காண்பதற்காகக் கைகளின் நீளத்திற்கு அதை உயர்த்திக் காட்டி நோன்பை முறித்தார்கள். மக்காவை அடையும் வரை நோன்பு நோற்க வில்லை. இது ஒரு ரமளானில் நடந்தது! 

'நபி(ஸல்) அவர்கள் (பயணத்தில்) நோன்பு நோற்றும் இருக்கிறார்கள்; நோன்பைவிட்டும் இருக்கிறார்கள். (நோன்பு நோற்க) விரும்புபவர் நோன்பு நோற்கலாம்; நோன்பைவிட்டுவிட விரும்புபவர் விட்டு விடவும் செய்யலாம்!' (புகாரி 1948)

எனவே பயணத்தில் செல்பவர் சக்தியுள்ளவராக இருப்பாரேயானால் அவர் விரும்பினால் நோன்பை நோற்றுக் கொள்ளலாம். பலகீனமானவர் என்றால் பயணத்தில் நோன்பை நோற்காமல் ஊரில் இருக்கும் போது அந்த நோன்பை களா செய்து கொள்ளலாம்.

பஸ் ஓட்டுனர் (டிரைவர்), அல்லது தொழிலே ஓட்டுனர் (டிரைவர்) என்றால் அவர்கள் ரமலானில் நோன்பை பிடிப்பதே பொருத்தமாகும். ஏன் என்றால் இப்படி பட்டவர்கள் ரமலானிலும் பயணம் தான் ரமலான் அல்லாத காலத்திலும் பயணம் தான்.
எனவே பயணிகள் சந்தர்ப்ப சூழ்நிலைகளை கருத்திக் கொண்டு நோன்பு விடயத்தில் நடந்து கொள்ளவும். அல்லாஹ் போதுமானவன்.

                                                                                      மௌலவி யூனுஸ் தப்ரீஸ்

தீன் என்பது அல்லாஹ்வுடைய கட்டளை. நபி (ஸல்) அவர்களின் வாழ்க்கை வழிமுறையாகும். அதாவது அல்லாஹ்வுடைய கட்டளை என்றால் குர்ஆன், நபி (ஸல்) அவர்களின் வாழ்க்கை வழிமுறை என்றால் ஹதீஸ் ஆகும். குர்ஆனும் ஹதீ ஸும்தான் நமது வழிகாட்டிகள் என்பதை உலக மக்கள் ஏற்று அமல் செய்து கொண்டிருக்கிறார்கள்.
எந்த அமலாக இருப்பினும், அது நபி (ஸல்) அவர்கள் நமக்குக் காட்டித் தந்ததாக இருக்க வேண்டும். நாமாக அமல்களைச் செய்யக் கூடிய நிலையை உருவாக்கிக் கொள்ளக் கூடாது. அந்த அடிப்படையில் ஸஹர் முடிவு என்று இன்று எல்லாப் பள்ளி களிலும் நோன்புதான் அட்டவணையிலும் போடப்பட்டுள்ளதைக் காணலாம். இது சரியா? அல்லது பிழையா? என்பதைத் தெளிவுபடுத்துவதே இக்கட்டுரையின் நோக்கமாகும்.
பஜ்ரு தொழுகைக்கான அதான் (பாங்கு) 4.30 மணிக்கு என்றால், கிட்டத் தட்ட 4.15 ஸஹர் முடிவு என்று விளம்பரப் படுத்தியுள்ளதைக் காணலாம். அதாவது பஜ்ரு நேர பாங்கிற்கு முன் பதினைந்து நிமிடம் அல்லது இருபது நிமிடம் முன்னதாகவே ஸஹர் நேரம் முடிவடைந்து விடுகிறது. அதன் பின் சாப்பிட்டாலும் குடித்தாலும் நோன்பு முறிந்து விடும் என்று பேசக் கூடிய நிலையைக் காண்கிறோம்.
வானொலியிலும் கூட ஸஹர் நேரத்தில் அடிக்கடி இன்றைய சுப்ஹு தொழுகைக்கான அதான் சொல்லும் நேரம் இது, ஸஹர் முடிவு இது என்று சொல்லக் கூடிய நிலையை அனைவரும் கேட்கிறோம். பள்ளிவாசல் விளம்பரப் பலகையிலாக இருக்கலாம் அல்லது நோன்பு தாளிலாக இருக்கலாம் அல்லது வானொலி விஷேட ஸஹர் நேர நிகழ்ச்சியிலாக இருக்கலாம். எல்லோரும் மார்க்கத்தை மக்களுக்கு சொல்லிக் கொடுக்க வேண்டும் என்ற ஆர்வத்தில் போட்டி போட்டுக் கொண்டு செயல் படுவதைக் காணலாம்.
இது வரவேற்கக் கூடிய விடயமாகும். அதே நேரம் மார்க்கம் சொல்லித் தந்துள்ள வழிமுறையை விட்டு விட்டு, நாமாக தன் இச்சையாக எதையும் முடிவு செய்யும் அதிகாரம் நமக்குக் கிடையாது. தொடர்ந்து படியுங்கள்.
நோன்பின் இரவில் உங்கள் மனைவியரிடம் கூடுவது உங்களுக்கு அனு மதிக்கப்பட்டுள்ளது. அவர்கள் உங்களுக்கு ஆடை. நீங்கள் அவர்களுக்கு ஆடை. உங்களுக்கு நீங்கள் துரோகம் செய்து கொண்டிருந்தது அல்லாஹ்விற்குத் தெரியும். எனவே உங்கள் மன்னிப்பை ஏற்று, உங்களைப் பிழை பொறுத்தான். இப்போது முதல் அவர்களுடன் கூடுங்கள். அல்லாஹ் உங்களுக்கு விதித்ததை தேடுங்கள். வைகறை எனும் கயிறு (இரவு எனும்) கருப்புக் கயிறிலிருந்து வெள்ளைக் கயிறு தெளிவாகும் வரை உண்ணுங்கள், பருகுங்கள். பின்னர் இரவு வரை நோன்பை முழுமைப்படுத்துங்கள். (2:187)
இந்த வசனத்தில் முதலாவதாக நோன்பு கால இரவு நேரங்களில் தனது மனைவியுடன் சேரலாம் என்ற சட்டத்தையும், இரண்டாவதாக ஸஹர் முடிவைப் பற்றி அல்லாஹ் தெளிவுபடுத்துகிறான். அதில் கருப்புக் கயிறிலிருந்து வெள்ளைக் கயிறு தெளிவாகும் வரை உண்ணலாம், பருகலாம் என்றால், கருப்புக் கயிறு என்பது இரவு வெள்ளைக் கயிறு என்பது சுப்ஹு நேர வெளிச்சம் என்பதை இந்த வசனம் சம்பந்தமான ஹதீஸ்கள் தெளிவுபடுத்து வதை அவதானிக்கலாம்.
இந்த வசனம் இறங்கியவுடன் சில நபித் தோழர்கள் கருப்புக் கயிறை தனது தலையணைக்கு கீழாக வைத்து காலையில் மாறுகிறதா? இல்லையா என்று பார்த்தனர். இன்னும் சில நபித்தோழர்கள் தனது கை கால்களில் கருப்புக் கயிறை கட்டிக்கொண்டு காலையை எதிர்பார்த்து, இறுதியில் இந்த வசனத்தின் விளக்கத்தை நபி (ஸல்) அவர்களிடம் வந்து கேட்டபோது, நபி (ஸல்) அவர்கள் பின்வருமாறு கூறினார்கள்.
கறுப்பு கயிறிலிருந்து விடியலின் வெள்ளைக் கயிறு உங்களுக்குத் தென்படும் வரை நீங்கள் உண்ணுங்கள், பருகுங்கள் (2:187) அருளப்பட்டபோது, நான் நபி (ஸல்) அவர்களிடம், அல்லாஹ்வின் தூதரே! நான் வெள்ளை நிறத்தில் ஒரு கயிறு, கறுப்பு நிறத்தில் மற்றொரு கயிறு என இரு கயிறுகளை என் தலையணையின் கீழ் வைத்து பகலில் இருந்து இரவை பிரித்து அறிய முயன்றேன். ஆயினும், என்னால் பிரித்து அறிய முடியவில்லை என்று சொன்னேன். வெள்ளைக் கயிறு, கறுப்புக் கயிறு என்பன அவற்றின் உண்மையான பொருளில் கூறப்படவில்லை. மாறாக இது இரவின் கருமையும், பகலின் வெண்மையுமே ஆகும் என்று நபி (ஸல்) அவர்கள் கூறினார்கள். (புகாரி-1916, முஸ்லிம்-1988)
அதேபோல மற்றொரு ஹதீஸ், ஸஹாபாக்கள் இரு கால்களிலும் கறுப்பு வெள்ளை கயிறுகளை கட்டிக் கொண்டு விளக்கம் கேட்ட ஹதீஸை புகாரி-1917, முஸ்லிம்-1990 இல் காணலாம்.
மேற்சென்ற குர்ஆன் வசனத்திற்கும் ஹதீஸ்களுக்கும் விளக்கமாக பின்வரும் ஹதீஸை கவனியுங்கள்.
பிலால் (ரழி) அவர்கள் (பின்) இரவில் தொழுவதை அறிவிப்புச் செய்வார். எனவே (பஜ்ர் தொழுகைக்காக) இப்னு உம்மி மக்தூம் செய்யும் தொழுகை அறிவிப்பை நீங்கள் கேட்கும் வரை உண்ணுங்கள், பருகுங்கள். (முஸ்லிம்-1991)
இதுபோல பல ஹதீஸ்களை புகாரியிலும் முஸ்லிமிலும் ஏனைய ஹதீஸ் கிரந்தங்களிலும் பார்க்கலாம். பிலால் (ரழி) தஹஜ்ஜுத்துக்கும் இப்னு உம்மி மக்தூம் (ரழி) சுப்ஹுக்கும் பாங்கு சொல்வார்கள். ஸஹர் முடிவை அல்லாஹ்வும், அல்லாஹ்வுடைய தூதரும் நமக்கு ஆழமாக சொல்லித் தருகிறார்கள்.
சுப்ஹ் அதான் சொல்ல ஆரம்பமாவதே ஸஹர் முடிவாகும். உதாரணத்திற்கு ரமழான் கால சுப்ஹு அதான் 4.30 என்றால், சரியாக 4.29 உடன் ஸஹர் முடிவடைந்து 4.30 சுப்ஹு அதான் ஆரம்பமாகிறது. அதன் பின் ஸஹர் உணவு உண்ண முடியாது. அது இல்லாமல் ரமழான் கால சுப்ஹு அதான் நேரம் 4.30 மணி என்றால் 4.15க்கே ஸஹர் முடிவடைந்து விட்டது என்றால் பொறுப்புதாரிகள் அல்லாஹ்வைப் பயந்துகொள்ள வேண்டும்.
மார்க்கத்தில் தெளிவாகக் கூறப்பட்ட ஒன்றுக்கு மாற்றமாக நமது செயல்பாடு இருக்கும் என்றால், அவர்களை விட இறை வெறுப்புக்குரியவர்கள் வேறு யாரும் இருக்க முடியாது.
இந்த ஸஹர் முடிவின் அடிப்படையில் ஒருவர் 4.15க்கு எழும்புகிறார் என்று வைத்துக் கொள்வோம். இவர் இந்த நோன்புத் தாளில் உள்ள அல்லது வானொலி ஸஹர் முடிவை நம்பி அல்லது பள்ளிவாசல் விளம்பர பலகையில் உள்ள ஸஹர் முடிவை நம்பி ஸஹர் செய்யவில்லையானால் இதற்கு யார் பொறுப்பு?
பொறுப்புதாரிகளே! சிந்தியுங்கள். பள்ளி நிர்வாகிகளே சிந்தியுங்கள்! உலமாக்களே சிந்தியுங்கள்! மார்க்கத்தில் உள்ளதை சரியாகக் கூறுவோம். மார்க்கத்தில் இல்லாததை விட்டு விடுவோம். இல்லாத ஒன்றை இருக்கிறது என்றோ, இருக்கிற ஒன்றை இல்லை என்று கூறி, நாம் ஏன் பாவத்திற்கு ஆளாக வேண்டும்?
அல்லாஹ்வும் அல்லாஹ்வுடைய தூதரும் சொன்ன ஒன்றை நாம் நடைமுறைப் படுத்துவதா? அல்லது நாம் பரம்பரை பரம்பரையாக செய்து வருவதை எப்படி விடுவது என்று அல்லாஹ் மற்றும் ரஸூலுக்கு மாற்றமாக நடப்பதா? என்பதை எல்லா பொறுப்புதாரிகளும் சற்று ஆழமாக சிந்தியுங்கள்.
அல்லாஹ் குர்ஆனில், அல்லாஹ்வும் அவனது தூதரும் ஒரு காரியத்தை முடிவு செய்த பின்னர், அதற்கு மாற்றம் செய்வதற்கு முஃமினான ஆணுக் கும் அதிகாரம் கிடையாது. முஃமினான பெண்ணும் அதிகாரம் கிடையாது. எவர்கள் மீறி செயல்படுகிறார்களோ அவர்கள் தெளிவான வழிகேட்டில் இருக்கிறார்கள். (33:36)
இந்த வசனத்தின்படி அல்லாஹ்வும் அல்லாஹ்வுடைய தூதரும் தீர்மானித்த ஒன்றை மாற்றியமைக்க எவருக்கும் உரிமை கிடையாது. அப்படி மீறுவோர் வழிகேடர்கள் என்பதைப் புரிந்துகொள்ள வேண்டும். இதன்படி ஸஹர் நேர முடிவை அல்லாஹ்வும் அல்லாஹ்வுடைய தூதரும் தீர்மானித்த பின் நமக்கு எந்த அதிகாரமும் கிடையாது என்பதை விளங்கி நடந்து கொள்ள வேண்டும்.
மார்க்கத்தில் எந்தக் கட்டாயமும் கிடையாது. எவர் வந்து சொன்னாலும் நாங்கள் கேட்க மாட்டோம் என்றாலும் நமக்கு எந்த பிரச்சினையும் கிடையாது. தெரிவிப்பது நாங்கள், தீர்மானிப்பது நீங்கள் என்ற அடிப்படையில் தரப்பட்ட ஆதாரங்கள் எங்கி ருந்து தரப்பட்டுள்ளது என்பதைக் கவனியுங்கள். விரும்பினால் எடுத்துக் கொள்ளுங்கள் அல்லது தெளிவு கிடைத்த பின்னரும் முரண்டு பிடித்தால் நீங்களும் அல்லாஹ்வும் பார்த்துக் கொள்ளுங்கள்.
நோன்பின் நிய்யத்து
நிய்யத் என்று சொல்லும்போது உள்ளத்தால் எண்ணிக் கொள்வதாகும். ஒவ்வொரு அமலுக்கும் நிய்யத் வைக்க வேண்டும்.
நபி (ஸல்) அவர்கள் ஒவ்வொரு அமலையும் செய்துவிட்டு, அதை இப்படித்தான் செய்ய வேண்டும் என நமக்கு சொல்லித் தந்துள்ளார்கள். இதனால்தான் அல்லாஹ் வும் குர்ஆனில் “அந்தத் தூதரிடத்தில் அழகிய முன்மாதிரி உள்ளது” என்று சுட்டிக் காட்டுகிறான். இதன்படி நபி (ஸல்) அவர்கள் ஹஜ்ஜைத் தவிர வேறு எந்த அமலுக்கும் வாயால் நிய்யத்தை சப்தமாக மொழியவில்லை. உள்ளத்தால் நினைத்துக் கொள்வார்கள். எனவே, நிய்யத்தை உள்ளத்தால் எண்ணிக் கொள்வது ஸுன்னத் ஆகும்.
என்றாலும் நோன்பிற்காக இரவு தராவீஹ் எனும் தொழுகை தொழுது வித்ரெல்லாம் தொழுது முடிந்த பிறகு நிய்யத்தை இமாம் சொல்லிக் கொடுக்க பின்னால் உள்ள மஃமூம்கள் சப்தமாக சொல்வதை பரம்பரை பரம்பரையாக காணப்படுகின்றன. அதுவும் மூன்று முறை திருப்பித் திருப்பி சொல்லிக் கொடுக்கப்படுகிறது.
இந்த நிய்யத்தைப் பற்றியும், இதை நபி (ஸல்) அவர்கள்தான் கற்றுத் தந்தார்களா என்பதை குர்ஆன் ஹதீஸின் வழியில் சற்று பார்ப்போம்.
அந்த நிய்யத்தைப் பொறுத்தவரை இந்த வருடத்தின் ரமழான் மாதத்தின் பர்ளான நோன்பை அதாவாக நாளைப் பிடிக்க நிய்யத் செய்கிறேன் அல்லாஹ்வுக்காக என்று அரபியிலும் தமிழிலும் மூன்று முறை சொல்லிக் கொடுக்கப்படுகிறது.
முதலில் இந்த நிய்யத்திலுள்ள தவறுகளை கவனியுங்கள். தராவீஹ் தொழுகை முடிந்த உடன் இந்த நிய்யத் சொல்லிக் கொடுக்கப்படுகிறது. அதில் நாளை பிடிக்க என்று கூறுகிறார்கள். இஸ்லாமிய அடிப்படையில் நாளை என்ற ஒரு சொல்லைப் பயன்படுத்தும்போது இன்ஷா அல்லாஹ் என்று கூறவேண்டும். எந்தளவிற்கு என்றால், நபி (ஸல்) அவர்களுக்குக் கூட அல்லாஹ் நபியே! நாளை ஒரு செயலை செய்வேன் என்று கூறாதீர்கள். அல்லாஹ் நாடினாலே தவிர என்று சேர்க்காமல்” (18:24) என்று நினைவுபடுத்துகிறான்.
அப்படியானால் நாளை என்று அல்லது எதிர்கால சொல்லைப் பயன்படுத்தும்போது இன்ஷா அல்லாஹ் சொல்ல வேண்டும் என்று அல்லாஹ் சொல்லித் தருகிறான். அதை நபி (ஸல்) அவர்கள் உறுதிப்படுத்துகிறார்கள். இன்ஷா அல்லாஹ் சொல்லாமல் நடந்த சில சம்வங்களின் விபரீதத்தையும் நாம் காணலாம்.
சுலைமான் நபி, தனது எல்லா மனைவி மார்களிடம் இன்று சேர்ந்து அதன் மூலம் அல்லாஹ்வின் பாதையில் போரிடும் நூறு குதிரை வீரர்களை பெற்றெடுப்பேன் என்று கூறினார்கள். ஆனால், அல்லாஹ் அப்படி யான எந்தக் குழந்தையையும் கொடுக்க வில்லை. இந்த நிகழ்ச்சியைப் பற்றி நபி (ஸல்) அவர்கள் கூறும்போது சுலைமான் நபி இன்ஷா அல்லாஹ் கூறியிருந்தால் அவர்கள் சொன்னது போல நடந்திருக்கும் என்றார்கள். இந்த ஹதீஸை புஹாரியில் காணலாம்.
எனவே அன்பிற்குரிய உலமாக்களே! மதிப்பிற்குரிய பெரியவர்களே தாய்மார்களே! சற்று நிதானமாகச் சிந்தித்து சரிதானா? பிழைதானா என்று ஒரு முடிவுக்கு வாருங்கள். இன்ஷா அல்லாஹ் சொல்லாமல் சொல்ல முடியுமா? பேச முடியுமா? என்பதையும் சற்று ஆழமாக சிந்தித்து செயல்படுங்கள்.
இந்த நிய்யத்தில் இரண்டாவது பிழை என்னவென்றால், நிய்யத் சொல்லிக் கொடுக்கப்படும் நேரம் இரவு சுமார் 9.30 மணி. அப்படியானால் முஸ்லிம்களுக்கு பிறை கணக்குதான் நாள் கணக்காகும். எனவே அன்று மஃரிபி லிருந்து அடுத்த மஃரிப் வரை ஒரு நாள்தான். அதாவது அதே நாளில் தான் இருக்கிறோம். அதே நாளில் தான் நோன்பு பிடிக்கிறோம். அப்படியானால் அதேநாளில் இருந்து கொண்டு எப்படி நாளை பிடிப்பேன் என்று கூறமுடியும்?
சற்று நிதானமாகச் சிந்தித்துப் பாருங்கள். இந்த நிய்யத்தின் மூன்றாவது பிழை மீண்டும் இரவின் கடைசிப் பகுதியான அந்த ஸஹர் நேரத்திலும் உணவை உட்கொண்ட பிறகு அவரவர் தனித் தனியாக சொல்லிக் கொள்வார்கள். அந்த நிச்சயத்தை வைத்துக் கொள்ளுங்கள் என்றும் வீடுகளில் நினைவூட்டப்படும்.
அப்படியானால் சூரிய கணக்குப் படியும் தவறாகும். ஏன் என்றால் இரவு 12.00 மணியிலிருந்து மறுநாள் இரவு 12.00 மணிவரை ஒரு நாளாகும். அதிகாலை நோன்பு பிடித்த நாம் மஃரிபுடன் நோன்பை திறக்கிறோம் என்றால் அதேநாளில் இருந்து கொண்டு எப்படி நாளை பிடிப்பேன் என்று கூற முடியும்?
எனவே பிறை கணக்கான சந்திரக் கணக்கின் அடிப்படையிலும் பிழைதான். சூரிய கணக்கின் அடிப்படையிலும் பிழை தான். ஷரீஅத் படியும் பிழைதான்.
இந்த நிய்யத்தின் மற்றொரு தவறு என்ன வென்றால் ஒருவர் சொல்லிக் கொடுக்க பின்னால் உள்ளவர்கள் சொல்லும் வழமையை நபி (ஸல்) அவர்கள் நமக்குக் காட்டித் தரவில்லை.
அதேபோல் இந்த நிய்யத்தின் அடுத்த பிழை என்னவென்றால் திரும்பத் திரும்ப மூன்று முறை சொல்லிக் கொடுப்பது. நபி (ஸல்) அவர்கள் எந்த அமல்களுடைய நிய்யத்தையும் இப்படி மூன்று முறை சொன்னதாகவோ சொல்லும்படியோ கூறவில்லை.
இப்படி பல கோணத்தில் இந்த நோன்பு நிய்யத் பிழை என்பதையும், இந்த நிய்யத்தை நபி (ஸல்) அவர்கள் கற்றுத் தரவில்லை என்பதையும் விளங்கிக் கொள்வதோடு, நோன்பு நிய்யத்தைப் பொறுத்த வரை அல்லாஹ்வுக்காக நோன்பு பிடிக்கிறேன் என்று உள்ளத்தில் அவரவர் நினைத்துக் கொள்ள வேண்டும்.
                                                                                         மௌலவி யூனுஸ் தப்ரீஸ் 

ஒரு மனிதர் இரவுத் தொழுகையைப் பற்றி நபி (ஸல்) அவர்களிடம் கேட்டார் அதற்கு நபி (ஸல்) அவர்கள் இரவுத் தொழுகை இரண்டு, இரண்டாகும். சுப்ஹை பயந்தால் (ஒரு ரக்கத்து) வித்ரை தொழவும். புகாரி, முஸ்லிம். 
இந்த ஹதீஸின் மூலம் இரவுத் தொழுகை குறிப்பிட்ட எண்ணிக்கை இல்லாமல் எவ்வளவும் தொழலாம். என்று சில அறிஞர்களை மேற் கோள் காட்டி பேசியும், எழுதியும், வருவதை காணலாம்.
இது சரிதானா? அல்லது எப்படி அணுக வேண்டும்? என்பதை ஹதீஸ்கள் மூலம் விளங்கிக் கொள்வோம்.
இரவுத் தொழுகை சம்பந்தமாக மேற்ச் சுட்டிக் காட்டிய ஹதீஸ மட்டும் வந்திருந்தால் இரவுத் தொழுகைக்கு எண்ணிக்கை இல்லை, எவ்வளவும் தொழலாம் என்ற முடிவுக்கு வரலாம். ஆனால் எண்ணிக்கையோடு பல ஹதீஸ்கள் வந்திருப்பதால் அதையும் பார்த்து விட்டு ஒரு முடிவுக்கு வருவோம்.
ரமலானில் நபி (ஸல்) அவர்களின் இரவுத் தொழுகை எவ்வாறு இருந்தன என்று கேட்கப் பட்ட போது அதற்கு ஆயிஷா(ரலி) அவரகள் ரமலானிலும், ரமலான் அல்லாத காலங்களிலும், பதினொன்ரைத் தவிர அதிகப் படுத்தியது கிடையாது. நான்கு ரக்அத்துகள் தொழுவார்கள், அதன் நீளத்தையும், அழகையும் கேட்க வேண்டாம்.பிறகு நான்கு ரக்அத்துகள் தொழுவார்கள், அதன் நீளத்தையும், அழகையும், கேட்க வேண்டாம். பிறகு மூன்று ரக்அத்துகள் தொழுவார்கள். (புகாரி 1147, முஸ்லிம் 738)
நபி (ஸல்) அவர்கள் இரவிலே பதினொன்று ரக்அத்துகள் தொழுவார்கள். அதில் ஒன்றை வித்ராக தொழுவார்கள். மற்றொரு அறிவிப்பில் ஒவ்வொரு இரண்டு ரக்அத்துகளுக்கும் இடையில் ஸலாம் சொல்வார்கள். ஒரு ரக்அத்தை வித்ராக தொழுவார்கள். (முஸ்லிம்: 736) இப்னு அப்பாஸ் (ரலி) அவர்கள் அறிவிக்கும் மற்றொரு அறிவிப்பில் நபி (ஸல்) அவர்கள் பதிமூன்று ரக்அத்துகள் தொழுதார்கள்.
முதலில் இரண்டு ரக்அத்துகள், பிறகு இரண்டு ரக்அத்துகள், பிறகு இரண்டு ரக்அத்துகள், பிறகு இரண்டு ரக்அத்துகள், பிறகு இரண்டு ரக்அத்துகள், பிறகு இரண்டு ரக்அத்துகள், பிறகு ஒரு ரக்அத் வித்ரு தொழுதார்கள். பிறகு ஒருங்கிணைத்துப் படுத்துக் கொண்டார்கள். பிறகு சுப்ஹீ தொழுகைக்கு பாங்கு சொன்னவுடன், சுருக்கமாக இரண்டு ரக்அத்துகள் தொழுவார்கள். (புகாரி 992, முஸ்லிம் 763)
அதே போல “ஸைத் இப்னு ஹாலித் ஜஹ்னி (ரலி) அவர்கள் அறிவிக்கும் ஹதீஸில் நபி (ஸல்) இரண்டு, இரண்டு, ரக்அத்துகளாக பண்ணிரெண்டு ரக்அத்துகள் தொழுவார்கள். பிறகு ஒரு ரக்அத்து வித்ரு தொழுவார்கள். அது தான் அந்த பதிமூன்று ரக்அத்துகள்.” (முஸ்லிம் 765)
ஆயிஷா (ரலி) அவர்கள் அறிவிக்கும் மற்றொரு ஹதீஸில் நபி (ஸல்) அவர்கள் இரவிலே பதிமூன்று ரக்அத்துகள் தொழுவார்கள். அதில் ஐந்து ரக்அத்துகளை வித்ராக தொழுவார்கள். அதனுடைய கடைசியிலேயே தவிர உட்காரமாட்டார்கள். (முஸ்லிம் 737)
ஆயிஷா (ரலி) அவர்கள் அறிவிக்கும் மற்றொரு ஹதீஸில் ” நபி (ஸல்) அவர்கள் பதினொன்று ரக்அத்துகள் தொழுவார்கள். எட்டாவது ரக்அத்திலே தவிர உட்காரமாட்டார்கள். எட்டாவது ரக்அத்தில் உட்கார்ந்து அத்தஹியாத்து ஓதியப் பின் ஸலாம் கொடுக்க மாட்டார்கள்,எழுந்து தொடர்ந்து ஒன்பதாவது ரக்அத்தை தொழுவார்கள். அதில் உட்கார்ந்து அத்தஹியாத்து ஓதி ஸலாம் கொடுப்பார்கள். (முஸ்லிம் 746) மற்றொரு அறிவிப்பில் நபி (ஸல்) அவர்கள் (ஒரே ஸலாமில்) இரவில் ஏழு ரக்அத்துகள் தொழுவார்கள்.
அதேப் போல “உமர் (ரலி) அவர்களின் காலத்தில் உபை இப்னு கஃப் (ரலி) மற்றும், தமீமுத் தாரி அன்சாரி (ரலி) அவர்களை மக்களுக்கு பதினொன்று ரக்அத்துகள் தொழுவிக்குமாறு உமர் (ரலி) அவர்கள் ஏவினார்கள். (ஆதாரம் முஅத்தா பாடம் : ரமலானில் தொழுகை) மேற்ச் சுட்டிக் காட்டிய ஹதீஸ்களில் முதலாவது கவனிக்க வேண்டியது இரவுத் தொழுகையும், அதன் எண்ணிக்கைகளும். 
நபி (ஸல்) அவர்கள் பதினொன்று ரக்அத்துகள் தான் தொழுதுள்ளார்கள் என்பது தெளிவான சான்றாகும். இரண்டாவது.” உங்களில் ஒருவர் இரவிலே எழுந்து தொழுதால் சுருக்கமாக (இலேசாக) இரண்டு ரக்அத்துகள் தொழுது கொள்ளட்டும் என்று நபி (ஸல்) அவர்கள் கூறினார்கள். (முஸ்லிம் 767) எனவே இந்த ஹதீஸின் மூலம் இரவுத் தொழுகையை ஆரம்பிக்கும் முன் இரண்டு ரக்ஆத்துகள் சுருக்கமாக தொழுது கொள்ளலாம். எனவே தான் நபி (ஸல்) அவர்கள் இரவிலே பதிமூன்று ரக்அத்துகள் தொழுதுள்ளார்கள் என்பதைக் காணலாம்.
இங்கு நமக்கு பிரச்சனை என்னவென்றால் இரவுத் தொழுகை இரண்டு, இரண்டு என்பதின் மூலம் நாம் நினைத்த அளவு எண்ணிக்கை குறிப்பிடாமல் தொழலாமா என்றால் கூடாது. ஏன் என்றால் இரவுத் தொழுகை இரண்டு, இரண்டு என்ற ஹதீஸை நடைமுறைப் படத்தியவர்கள் நபி (ஸல்) அவர்களும், ஸஹாபாக்களும் தான். நபி (ஸல்) அவர்கள் அமல் விடயமாக ஒரு விடயத்தை ஏவுகிறார்கள் என்றால் முதலில் அவர்கள் தான் நடைமுறைப் படுத்துவார்கள். அதனைத் தொடர்ந்து ஸஹாபாக்களும் நடைமுறைப் படுத்துவார்கள். ஆகவே இரவுத் தொழுகை இரண்டு, இரண்டு என்பதை பதினொன்று ரக்அத்துகள் தொழுது, நமக்கு வழிக் காட்டியுள்ளார்கள்.
அதனால் தான் உமர் (ரலி) அவர்களின் ஆட்சி காலத்திலும் கூட பதினொன்று ரக்அத்துகளை தொழுவிக்குமாறு ஏவியுள்ளார்கள். அடுத்தது மார்க்கத்தில் ஒரு சட்டம் விசயமாக பேசும் போது அந்த சட்டம் சம்பந்தமான எல்லா ஹதீஸ்களையும் முன் வைத்து தான் முடிவெடுக்க வேண்டும். ஒரு ஹதீஸை மட்டும் வைத்து முடிவெடுப் போம் என்றால் அவர், அவர் ஒவ்வொரு ஹதீஸை வைத்து முடிவெடுக்க ஆரம்பித்து விடுவார்கள்.
உதாரணத்திற்கு இரவுத் தொழுகை இரண்டு, இரண்டு என்பதிலிருந்து எவ்வளவும் தொழலாம் என்றால், நபி (ஸல்) அவர்கள் ஒன்பது ரக்அத்கள் இரவில் தொழுதார்கள் என்ற ஹதீஸை முன் வைத்து, இரவுத் தொழுகை ஒன்பது தான் என்று சொல்ல வேண்டியது வரும். நபி (ஸல்) அவர்கள் இரவிலே ஏழு ரக்அத்துகள் தொழுதார்கள், எனவே இரவுத் தொழுகை ஏழு தான் என்று சொல்ல வேண்டி வரும். எனவே இரவுத் தொழுகை சம்பந்தமான எல்லா ஹதீஸ்களையும் ஒன்றிணைத்து பின் வரும் முடிவுக்கு வரலாம். 
நபி (ஸல்) அவர்கள் இரண்டு, இரண்டு ரக்அத்துகளாக பதினொன்று ரக்அத்துகள் தொழுதுள்ளார்கள். சில சந்தர்ப்பங்களில் அந்த பதினொன்று ரக்அத்தை தொழும்போது ஒரே ஸலாமில் ஒன்பது ரக்அத்துகளையும், மற்றொரு சந்தர்ப்பத்தில் ஒரே ஸலாமில் ஏழு ரக்அத்துகளையும், தொழுதுள்ளார்கள் என்பதை விளங்கிக் கொள்ளலாம். எனவே நபியவர்கள் காட்டித் தராத ஒன்றை மார்க்கமாக நடைமுறை படுத்த முடியாது., இந்த, அறிஞர்கள் சொல்லியுள்ளார்களே என்பது இஸ்லாத்தின் அளவு கோல் கிடையாது என்பதை நாம் தெளிவாக விளங்கிக் கொள்ள வேண்டும். அல்லாஹ்வே மிக அறிந்தவன்.
                                                                                        மௌலவி:- யூனுஸ் தப்ரீஸ்

ரமழான் சமூகரீதியாக பசியின் கொடுமையை உணரவும் வசதியுள்ளவன் வறியவனின் துன்பங்களை அறியவும் அவற்றுள் பங்கு கொள்ளவும் துணை செய்கிறது. இது ஏழை பணக்காரன் என்ற பொருளாதார இடைவெளியை மானசீகமாகக் குறைத்து விடுவதற்கும் சமூகத்திற்குள் தோன்றும் வகுப்புவாதத்தையும் ஏற்றத்தாழ்வையும் அகற்றி மனிதர்களின் சமூக அந்தஸ்து உறுதிப்படுத்தவும் உதவுகின்றது.



அஸ்ஸலாமு அலைக்கும் வரஹ்மதுல்லாஹி வபரகாதுஹு.
அனைவருக்கும் அல்லாஹ்வின் அருளை பிரார்தித்தவனாக!
பிறையினுடைய விவகாரம் இன்று பல கருத்துக்கள் முன்வைக்கப்பட்டு பேசப்படுவதை காண்கிறோம்.
பிறையினுடைய விவகாரம் உண்மையில் குர்ஆன் சுன்னாவில் தெளிவான ஓர் விடையமே. இருந்தபோதிலும் இம் மஸ்அலாவில் சர்வதேசப் பிறை என்றும் நாட்டுக்கு நாடு உள்ளூர் பிறை என்றும் பிரதானமான இரண்டு கருத்துக்கள் இருந்துவருகின்றது.

அதில் நமது ஆய்வின் பிரகாரம் நாம் சர்வதேசப் பிறையை 100 வீதம் சரி காண்கிறோம்.
சர்வதேச பிறை என்பது உலகத்தின் எப் பாகத்தில் பிறை தென்பட்டதாக சட்சியத்தின் அடிப்படையில் செய்தி வந்தாலும் அந்தப் பிறையை உலக முஸ்லீம்கள் அனைவரும் அவர்கள் மாதத்தை அடையும் போதோ அல்லது முடிக்கும் போதோ எடுத்து செயற்படுத்த வேண்டும் என்பதாகும்.....

ஆதாரம்:- 01

🌒பிறையை கண்டு நோன்பு பிடியுங்கள் பிறையை கண்டு நோன்பை விடுங்கள் பிறை மறைக்கப்பட்டால் மாதத்தை 30 ஆக பூர்த்தி செய்யுங்கள் (புஹாரி)

🌛இங்கு பிறையை கண்டு நோன்பு வையுங்கள் என்றுதான் கூறப்படுகிறதே ஒழிய அந்தந்த நாட்டில் காணுங்கள், இந்த இந்த பகுதியில் காணுங்கள் என்றில்லை. குர்ஆனோ ஹதீஸோ நாடுகளாக எல்லை போடவில்லை. அது நாமாக ஏற்படுத்திக் கொண்டது. எனவே பிறை ஒன்றுதான், தலைப்பிறை ஒரு மாதத்தில் ஒரு முறைதான் தென்படும், அதனால் எங்கு முதல் பிறை தென்படுகிறதோ அந்தப் பிறையையே உலக முஸ்லீம்கள் மாதத்தை ஆரம்பிக்கவும் மாதத்தை முடிக்கவும் எடுத்துக்கொள்ள வேண்டும்.

🌗பிறையை நாம் மாதத்தை 29 ஆக பூர்த்தி செய்துவிட்டே எதிர்பார்க்க வேண்டும்.
உங்களில் யார் அம்மாதத்தை அடைகிறாரோ அவர் நோன்பு நோற்கட்டும். (அல்குர்ஆன் 02:186)

மாதத்தை 29 ஆக பூர்த்தி செய்யும் அச்சமையம் எம் நாட்டிலோ எம் நேரத்தை ஒத்த நாடுகளிளோ பிறை தென்படவில்லை என வைத்துக் கொண்டால் நமக்கு பின் வருகிற ஏதாவது ஒரு நாட்டில் பிறை தென்பட வாய்ப்பு உண்டு.
அப்படி தென்பட்ட செய்தி சாட்சிகளின் அடிப்படையில் ஊர்ஜிதமான முறையில் கிடைக்கப்பெற்றால் அதுவே எல்லா முஸ்லீம்களுக்கும் மாதத்தை ஆரம்பிக்கும் அல்லது முடிக்கும் பிறையாகும்... அதை ஏற்று நோன்பெடுப்பதும் நோன்பை விடுவதும் கடமையாகும்.

ஆதாரம்:- 02

நபித்தோழர் ஒருவர் கூறுகின்றார் எங்களுக்கு ஷவ்வாலின் பிறை மறைக்கப்பட்டிருந்ததால் நாங்கள் நோன்பாளியாக கலையை அடைந்தோம் அப்போது பகலின் இறுதியில் ஒரு பிரயாணக் கூட்டம் வந்து அவர்கள் நேற்று பிறையை கண்டதாக நபிகளாரிடம் சாட்சி சொன்னார்கள்.அப்போது நோன்பை விடுமாறும் மறுநாள் தொழுகைக்கு வெளியேறுமாறும் நபிகளார் மக்களுக்கு கட்டளை இட்டார்கள்.. (முஸன்னப் இப்னு அபீ ஷைபா ---------------9461/முஸன்னப் அப்துர்ரஸ்ஸாக்- 📚7339)

இந்த ஹதீஸ் பல அறிவிப்பாளர் வழியாக வந்திருந்தாலும் அனைத்தையும் ஒருங்கிணைத்து ஆய்வுக்குட்படுத்தினால் இதில் நபிகளார் இட்ட கட்டளை நபிகளாரையும் ஸஹாபாக்களையுமே தெளிவாக குறிக்கின்றது. காரணம் நபி ஸல் அவர்களும் ஸஹாபாக்களும் நோன்போடு இருந்தார்கள் என்பதே இந்த ஹதீஸின் ஆரம்பமாகும்.

இங்கு தமது பிரதேசத்தில் பிறை காணப்படாத பொழுது வெளியூரில் இருந்து பிறை கண்டதாக வந்த சாட்சியத்தை நபிகளார் ஏற்றுக் கொண்டார்கள்.
இந்த நிலைப்பாடே பிறை விடையத்தில் குர்ஆன் ஹதீஸை ஒத்ததாகும்.

சர்வதேசப் பிறையை மறுக்க அனேகரிடம் எழுகின்ற கேள்வி என்னவெனில் நமக்கும் ஏனைய நாடுகளுக்குமிடையில் நேர வித்தியாசமுண்டே???

பதில்👉👉உலக நாடுகள் நேர அளவில் வித்தியாசப்படுவது உண்மையிலும் உண்மையே அதனை நாம் ஏற்றே நம் நிலைப்பாட்டை எவ்வித நடைமுறை சிக்கலுமின்றி முன்வைக்கின்றோம்..

உதாரணமாக இலங்கையில் இருப்பவர்கள் ஞாயிரு மாலை 06.00 மணியளவில் பிறையை பார்கிறோம்🌙பிறை தென்படவில்லை... அதே நேரம் இலங்கைக்கு அடுத்தடுத்து வரும் நாடுகள் 👉🏿உதாரணமாக:-  சவூதியில் இருப்பவர்கள் பிற்பகல் 3.30 மணியில் இருப்பார்கள் இன்னும் சில நாடுகள் பிப.2.00, 1.00,12.00,காலை10.00, 09.00, 08.00 .......இப்படி இந்த நாடுகளில் இருப்பவர்கள் இன்னும் பிறை பார்கும் நேரத்தை அடையாமலிருப்பார்கள்...
இதில் எந்த சிக்கலும் இல்லை நேரம்தான் நமக்கும் அவர்களுக்குமிடையில் வித்தியாசம்.....  நாள் அல்ல எவ்வளவுதான் நேர வித்தியாசம் ஏற்பட்டாலும் அது கூடி குறையுமே ஒழிய நாள் வித்தியாசமாகாது. 

நான் மேலே குறிப்பிட்ட நேர வரையறையில் இருப்பவர்களும் அதே ஞாயிற்றுக் கிழமையில்தான் இருப்பார்கள், இதில் என்ன சிக்கலுண்டு? நாம் பிறை பார்த்துவிட்டு தென்படாததால் இரவு 10.00 மணியில் இருப்போம் அப்போதுதான் சவூதியில் பிறை பார்பார்கள் அதே ஞாயிரு பிறை தென்பட்டவுடன் பிறையினுடைய செய்தியை எமக்கு அறிவிப்பார்கள் நாமும் அந்த சாட்சியத்தை நபிகளார் மேற்சொன்ன செய்தியில் ஏற்றது போல் ஏற்றுக்கொள்வோம்.. 

இப்பொழுது இரண்டு பேறும் திங்கள் சஹர் சொய்வோம் நாம் சஹர் செய்து 02.30 மணித்தியாலத்தின் பின் அவர்கள் சஹர் செய்வார்கள் எல்லாம் ஞாயிருதான்....இதில் என்ன குழப்பம் நமக்கு??? இப்படித்தான் மற்றைய நாடுகளும் நேரத்தால் வேறுபடும்.

அது போன்றதொரு வாதம்தான் நம்மவர்கள் அமெரிக்க நேரம் நம்மை விட 12.00 மணித்தியாளங்கள் வித்தியாசம் என்று அது சாத்தியமில்லை என்பார்கள்.

இது கூட நம்மவர்களின் புரிதலில் ஏற்பட்ட தவரேயாகும்... அமெரிக்காவுக்கும் நமக்கும் நேரம்தான் வித்தியாசம் உதாரணம் நாம் திங்கட்கிழமை பிற்பகல் 12.00 மணியில் இருக்கும் பொழுது அமெரிக்கர்கள் அப்பொழுதுதான் திங்கட்கிழமை அதிகாலை 12.00 மணிக்குள் நுழைகிறார்கள். நாம் திங்கள் மாலை 06.00 மணிக்கு பிறை பார்கும் போது அவர்கள் திங்கள் காலை 06.00 மணிக்கு அதே தினத்தில்தான் இருப்பார்கள். இவ் வேளை நமக்கு பிறை தென்படாமல் அமெரிகாவில் பிறை தென்பட்டுவிட்டால்.. அமெரிக்கர்கள் பிறை காணும் நேரத்தில் நாம் அடுத்த நாள் செவ்வாய் காலையை 30ஆக பூரணப்படுத்தி அந்த செய்தி கிடைக்காதவரைக்கும் நோன்போடு இருப்போம்...

செய்தி வந்துவிட்டால் நோன்பை விட வேண்டும் அடுத்த நாள் பெருநாள் எடுக்க வேண்டும்..அதற்குறிய ஆதாரம் மேலே குறிப்பிட்ட பிரயாணக்கூட்டத்தின் செய்தியாகும்...அந்த மாதம் நோன்பை ஆரம்பிக்கும் மாதமெனில் தகவல் கிடைத்தவுடன் சாப்பிட்டுக் கொண்டிருந்த நாம் சாப்பாட்டை நிறுத்தி செய்தி கிடைத்த நேரத்திலிருந்து நோன்பை தொடர வேண்டும்...இதற்கு ஆதாரம் அரபா நோன்பின் செய்தி....

இப்படி சர்வதேசப் பிறையில் எழும் அனைத்து கேள்விகளுக்கும் பதிலுண்டு சிந்தியுங்கள் நண்பர்களே!!! நமது நாட்டில்தான் பிறைபார்க்க வேண்டும் என நபிகளார் எந்த எல்லையும் இடவில்லை என்பதே உண்மையிலும் உண்மை......
01-நமக்கு லைலதுல் கத்ர் இரவு ஒரு நாள்தான்.
02-நமக்கு அரபா தினம் ஒரு நாள்தான்.
03- நமக்கு வெள்ளிக்கிழமையும் ஒரு நாள்தான்.
04- நமது உலகம் அழிவதும் ஒரு நாள்தான்.

தலைப் பிறை மட்டும் எப்படி இரண்டாக முடியும்??? அல்லது இரு தலைப்பிறைகள்தான் பிறக்க சாத்தியமுண்டா??
எம் அனைவருக்கும் இம் மஸ்அலாவில் போதிய தெளிவை வல்ல இறைவன் வழங்கிடுவானாக!           ஜஸாகுமுல்லாஹு ஹைரன்.

                                                                                   ஆக்கம்-ஜே.எம்.சாபித் (ஷரயி)

புனிதங்கள் பூத்துக் குலுங்கும் ரமழான் எம்மை எதிர் நோக்கி வந்து கொண்டிருக்கின்றது. வருடா வருடம் இந்த வசந்தம் எங்கள் வாசல் நோக்கி வந்து செல்கின்றது. இந்த வசந்தத்தினால் எமது வாழ்க்கையில் ஏற்பட்ட மாற்றங்கள் என்ன என்பதுதான் நாம் விடை காண வேண்டிய முக்கியமான ஒரு வினாவாகும். இந்தக் கோணத்தில் சில சிந்தனைகளை எனதும் உங்களதும் உள்ளத்துக்கு உணவாகஇ உரமாக இங்கே சிதறவிடலாம் என எண்ணுகின்றேன். 
புனித ரமழான் குர்ஆனின் மாதமாகும்:
புனித ரமழான் குர்ஆனின் மாதமாகும். எனவே, குர்ஆனுக்கும் எமக்குமிடையில் நெருக்கத்தையும் இறுக்கத்தையும் எற்படுத்தும் விதத்தில் இந்த மாதத்தைக் கழிக்க முற்படுவோம்.
நோன்பு தக்வாவை நோக்கமாகக் கொண்ட அமல்:
நோன்பு தக்வாவை நோக்கமாகக் கொண்ட அமலாகும். எனவே, தக்வா எனும் இறையச்சத்தை வளர்த்துக் கொள்ள முற்படுவோமாக!
நன்மைகள் செய்வதில் ஆர்வம் கொள்வதும் தீமைகளைத் தவிர்ந்து நடப்பதும் தக்வா எனப்படும். தக்வா என்பது ஆடையின் அடையாளம் அல்ல. எனவே, நன்மைகளில் ஆர்வம் காட்டுதல், தீமைகளை விட்டும் ஒதுங்குதல் என்ற பக்குவத்தை நோன்பினூடாக வளர்த்துக் கொள்ள முற்படுவோமாக! சுயவிசாரணை செய்து கொள்ள நல்ல சந்தர்ப்பம். நோன்பும் ரமழானும் நம்மை நாமே சுயவிசாரணை செய்து கொள்வதற்கான நல்ல சந்தர்ப்பங்களாகும்.
எனவே நம்மை நாமே சுயவிசாரணை செய்து எமது எதிர்காலத்தை சீர் செய்து கொள்ள முற்படுவோமாக!
போதை மற்றும் இன்னோரன்ன கெட்ட பழக்க வழக்கங்களை விட்டுவிடுவதற்கு சிறந்த சந்தர்ப்பம்: சிகரட், வெற்றிலை, மூக்குத்தூள் போன்ற இன்னோரன்ன தீய பழக்க வழக்கங்களுக்கு அடிமைப்பட்டவரர்கள் தம்மை மாற்றிக் கொள்வதற்கு ரமழான் ஒரு நல்ல சந்தர்ப்பமாகும். பகலில் 14 மணித்தியாலங்கள் இந்தப் பழக்கத்தை விட்டவர்கள் இரவில் விழித்துக் கொண்டிருக்கும் மீதி சொற்ப நேரத்தில் கட்டுப்பாட்டுடன் இருந்துவிட்டால் இது போன்ற இன்னும் பல தீய பழக்கங்களி லிருந்து விடுபட்டு விடலாம்.
செல்வத்தையும், உடல் ஆரோக்கி யத்தையும் கெடுக்கும் இத்தகைய பழக்கங்களி லிருந்து உங்களைப் பாதுகாக்கக் கூடிய இந்த நல்ல சந்தர்ப்பத்தை நாசப்படுத்திவிடாதீர்கள்!
ரமழானில் ஏற்படும் நல்ல மாற்றங்களை தொடர்ந்து கடைப்பிடிக்க உறுதி கொள்ளல்:
ரமழானில் ஏற்படும் நல்ல மாற்றங்களை ரமழான் முடிந்தவுடன் அவற்றையெல்லாம் மூட்டை கட்டி வைத்து விட்டு அடுத்த ரமழானை எதிர்பார்த்து பழைய படி எமது வாழ்க்கையை நாம் மாற்றிக் கொள்ள முற்படாமல்; ரமழான் தந்த நன்மாற்றங்களை எமது வாழ்நாள் முழுவதும் கடைப்பிடிக்க வேண்டும் என்ற உள உறுதியுடன் செயற்பட வேண்டும்.
இம்மாதம் இபாதத் அமலுக்குரியது:
ரமழான் மாதம் என்பது முற்று முழுதாக இபாதத் மற்றும் அமல்களுக்குரிய சிறந்ததொரு மாதமாகும். இம்மாதம் ஓய்வுக்கும், உறக்கத் துக்கும், கேலிக்கைகளுக்கும், சுற்றுப் பிரயாணங்களுக்கும் ஒதுக்கப்பட்ட மாதமன்று என்பதில் நாம் முக்கிய கவனம் செலுத்துதல் எமது கட்ட்டுப்பாடாகும்.

நோன்பு உணவையும் பானத்தையும் தவிர்ந்திருப்பது மட்டுமன்று!: நோன்பு என்பது வெறுமனே உணவையும் பாணத்தையும் தவிர்ந்திருப்பது மட்டுமன்றி வீணான செயல்கள், கெட்ட ஆபாசமான பேச்சுக்கள் மற்றும் பார்வைகள், தப்பான நடத்தைகள், துர்க்குணங்கள் போன்றவற்றை விலகியிருப்பதுமாகும். எனவே இவற்றில் மிகக் கவனமாக நடந்து கொள்ள வேண்டும்.
அளவோடு உண்டு ஆரோக்கியத்தோடு வாழ்வோம்:
நோன்பு காலத்தில் நாம் சுபஹ் முதல் மஃரிப் வரை உண்ணல், பருகல், என்பவற்றைத் தவிர்த்து வருகின்றோம். ஆனால் ஸஹர், இப்தார், அதன் பின்னர் உணவு என வழமையாக உண்பதை விட சற்று அதிகமாக உண்ணுகின்றோம். எமது உணவில் இனிப்பு, எண்ணெய், கொழுப்பு என அனைத்தையுமே வழமையான உணவுகளை விட இந்தக் காலத்தில் அதுவும் இந்நேரங்களில் அதிகமாகவே எடுத்துக் கொள்கின்றோம். இது பலதரப்பட்ட நோய்களை பலதரப்பட்ட காரணங்களால் ஏற்படுத்திவிடுகின்றன.
எனவே, அளவோடும், முறையோடும் உண்டு வழமோடு வாழ நாம் முற்பட வேண்டும்.
உண்ணலாம், பருகலாம் ஆனால், வீண்விரையம் இருக்கக் கூடாது என்பதில் நாம் மிகுந்த கவனம் செலுத்துவதும் எமது தலையாய கடமையாகும்.
ஸஹர் உண்போம்:
ஸஹர் உணவை நபி(ஸல்) அவர்கள் பரக்கத் பொருந்தியது என்று கூறியுள்ளார்கள். ஸஹரை முடிந்தவரைக்கும் தாமதித்தல் நல்லதாகும். உறக்கத்திற்காக ஸஹர் உணவை நல்லிரவில் உண்டுவிட்டு உறங்கிவிடுவது உகந்ததல்ல.
இப்தாரை விரைவுபடுத்துவோம்:
நோன்பு திறப்பதை தாமதிக்கச் செய்வது நல்லநன்று. நோன்பு திறப்பதை தாமதப்படுத்துவது உடல் ஆரோக்கியத்திற்கு ஏற்றதுமன்று. ஷரீஆவின் கண்டனத்திற்கும் உரியதாகும் என்பதைக் கவனத்திற் கொள்ளவும்.
ஈத்தம் பழமும் தண்ணீரும்:
நோன்பு திறப்பதற்கு மிகவும் ஏற்றது ஈத்தம் பழமும் தண்ணீருமாகும். ஈத்தம் பழத்தின் குளுக்கோஸ் மிக விரைவாக உடலில் தாக்கம் செலுத்தும். அதனால் பசியையும் போக்கும். தண்ணீரானது தாகத்தைத் தீர்க்கும். ஆதலால் நோன்பு திறப்பதற்கு மிகவும் ஏற்றது ஈத்தம் பழமும் தண்ணீருமாகும். மேலும், ஈத்தம் பழத்தை ஒற்றைப்படையாக உண்பதும் சுன்னாவாகும்.
அதான் சொல்லப்பட்டதும் ஈத்தம் பழம், தண்ணீர் கொண்டு நோன்பு திறந்துவிட்டு தொழுகை முடிந்த பின்னர் ஏனைய உணவுகளை உண்பது சிறந்ததாகும். வெறும் வயிற்றில் ஒரேயடியாக உணவுகளை உட்கொள் வது சோம்பலையும், களைப்பையும், மந்த நிலையையும் ஏற்படுத்தும். சிறிய வயதிலிருந்தே இப்படிப் பழக்கப்பட்டுவிட்டோம். இதைத் தவிர்ப்பதுதான் உடல் ஆரோக்கியத்திற்கும் இரவு வணக்கத்திற்கும் உகந்ததாகும்.
தேவையான அளவு நீர் அருந்துதல்:
நோன்பின் காரணமாக உடலில் தேவையான நீர்த்தன்மை குறையலாம். எனவே, தேவையான அளவு நீரருந்துதல் முக்கியமாகும். பணத்தைக் கொடுத்து பக்கட்டுக்களிலும், டின்களிலும் அடைக்கப்பட்ட பானங்களை வெறுமையாகவும் குளிரூட்டியும் அருந்தி உடல் நல ஆரோக்கியத்தைக் கெடுத்துக் கொள்வதை விட வெறும் தண்ணீர் அருந்துவதே ஏற்றமானதாகும். அத்துடன் நோன்பு திறந்ததும் அதிகம் குளிர்ந்த நீர் (குளிரூட்டியில் வைக்கப்பட்டது) அருந்துவதைத் தவிர்ப்பதும் உடல் நலத்திற்கு ஏற்றமானது.
எண்ணெயில் பொரித்த உணவுகள் மற்றும் இணிப்புக்கள்:
நோன்பு திறப்பதென்றால் ஏதோ ஒரு வகையில் எண்ணெயில் பொரித்த உணவு வகைகளும் பல்சுவை தரும் இனிப்புக்களும் நம் ஒவ்வொருவரது வீட்டிலும் இருப்பது இப்போது ஒரு சம்பிரதாயமாகவே மாறிவிட்டது எனலாம்.
அந்த வகையில் பெடிஸ், ரோல்ஸ், கட்லட், வடை.. என்றெல்லாம் அடுக்கிக் கொண்டே போகலாம். இதனால் பல நோய்கள் ஏற்பட வாய்ப்புள்ளது. ஆதலால், இவற்றை விட இயற்கையான பழங்கள் மிக மிக ஏற்றமானவை யாகும். எமது உணவு முறையில் மாற்றம் வந்தால் நிச்சயம் ரமழான் உள்ளத்திற்கும் உடலுக்கும் சிறந்த ஆரோக்கியமளிப்பதாக அமையும்.
ஸஹர் மற்றும் இப்தாரின் பின்னர் உறங்குவது கேடு தரும்:
நம்மில் பலர் ஸஹர் உண்டதும் உறங்கிவிடுகின்றோம். இன்னும் சிலர் இப்தாரின் பின்னர் களைப்பு என்ற போர்வையில் உறங்கிவிடுகின்றனர். இவை இரண்டுமே உகந்ததல்ல. தேகாரோக்கியம், உற்சாகம் இரண்டையும் இழக்கச் செய்து விடும். மென்மையான உணவுகளை இவ்விரு நேரங்களிலும் தயார் செய்து அளவோடு உண்ணும் பழக்கத்தைக் கடைப்பிடிப்போமாயின் மேற்படி நிலைகளைத் தவிர்த்துக் கொள்ளலாம்.
கோபத்தைக் குறைத்துக் கொள்வோம்:
பொதுவாக பசியோடு இருக்கும் போது அதிகமாகக் கோபம் வருவது இயல்பானது. இப்படியிருக்கும் போது கோபம் கொள்வது சுகர், கொலட்ஸ்ரோல் நோயாளிகளிடம் மாற்றத்தையும் தாக்கத்தையும் ஏற்படுத்தும். எனவே, கோபம் கொள்வதைத் தவிர்க்க வேண்டும். ரமழான் ‘ஸப்ர்” – பொறுமையின் மாதமல்லவா அதனால் இந்தக் காலகட்டத்தை நல்ல முறையில் பயன்படுத்திக் கொள்ள வேண்டும்.
மார்க்க வகுப்புக்களில் கலந்து கொள்ளல்:
அதிகமான ஹதீஸ் மஜ்லிஸ்கள், பயான் நிகழ்ச்சிகளில் பங்கு கொள்ளுங்கள். பயான்கள் ஈமானை மெருகூட்டும். அறிவை அதிகரிக்கச் செய்யும். பக்குவத்தைத் தரும் பண்பாட்டை உருவாக்கும்.
அதிகமாக இஸ்திஃபார் செய்வோம்!:
ரமழான் தவ்பாவின் மாதம் என்பதால் அதிகமாக ‘இஸ்திஃபார்” – தவ்பா செய்வது நம்மை நாம் மாற்றிக் கொள்ளவும் பாவங்களிலிருந்து பரிசுத்தப்படுத்திக் கொள்ளவும் ஒரு நல்ல சந்தர்ப்பமாகும். எனவே, இதை நாம் அதற்காக சரியான முறையில் பயன்படுத்திக் கொள்ள வேண்டும்.
நல்ல வாசிப்புப் பழக்கத்திற்கு வழிவகுத்துக் கொள்ளலாம்:
முடிந்தவரை நல்ல நூற்களை வாசிக்க முயற்சிக்க வேண்டும். வாசிப்புப் பழக்கம் இப்போது மங்கி மறைந்து வருகின்றது. வாசிப்பு ஒரு மனிதனை முழு மனிதனாக்கும் என்று கூறுவார்கள். எமது முன்னோர்கள் வாசிப்பை சுவாசிப்பது போல் முக்கித்துவமிக்கதாக நோக்கியுள்ளனர். எனவே, நாமும் வாசிக்க வேண்டும்.
இப்தாரின் முழுமையான பயன் பெற முயல வேண்டும்:
பொதுவாக ரமழான் காலங்களில் இப்தார் பயான் நிகழ்ச்சிகள் ஏற்பாடு செய்யப்படுவது வழக்கம். பெரும்பாலானோர் இந்நிகழ்ச்சிகளின் இறுதி நேரத்தில் நோன்பு திறப்பதற்காக மாத்திரம் கலந்து கொள்வர். இதைத் தவிர்த்துக் கொள்ள வேண்டும். இறுதி நேரத்தில் இப்தாருக்காக போய் சேராமல் ஆரம்பத்திலேயே சென்று கலந்து கொண்டு பயன்பெற முயல வேண்டும். எமது சிறுவர்களையும் இது விடயத்தில் உற்சாகப்படுத்தவும் வேண்டும்.
நோன்பு நோற்கப் பயிற்சியளிக்க வேண்டும்:
எமது கட்டுப்பாட்டில் உள்ள சிறுவர்களை நாம் நோன்பு நோற்கப் பயிற்சியளிக்க வேண்டும். அவர்களுக்கு நோன்பு மிகவும் சிரமத்தைக் கொடுப்பதாக இருந்தால் அவர்களுக்கு நோன்பை விட சலுகையளிக்கலாம்.
நபித்தோழர்கள் சிறுவர்களை நோன்பு நோற்கச் செய்வார்கள். அவர்கள் பசியின் கோரத்தை உணராமலிருக்க அவர்களுக்கு விளையாட்டுப் பொருட்களைக் கொடுத்து அவர்களைப் பசி உணர்வை விட்டும் பராக்காக்குவார்கள். இந்த வழிமுறையை நாமும் கைக் கொள்ளலாம்.
ஆகவே, முடிந்தவரை இந்த ரமழானை முன் சென்ற ரமழானை விட பயனுள்ளதாகக் கழிக்க முயற்சி செய்ய வேண்டும். இந்த ரமழான் எம்மில் மாற்ற முடியாது குடிகொண்டுள்ள, அல்லாஹ்வும் அவனது தூதரும் வெறுக்கும் விடயங்களை விரட்டியடிக்க ஒரு நல்ல சந்தர்ப்பமாகும். எல்லாம் வல்ல அல்லாஹ் அதற்காக நம் அனைவருக்கும் அருள் புரிவானாக!
                                                                            மௌலவி:- இஸ்மாயில்  சலபி 

ஒன்றுக்கு பலமடங்கு நன்மைகளை அள்ளித் தரும் புனிதமிக்க ர‌மளான் மாதம் நம்மை நெருங்கிவிட்ட நிலையில் அந்த ரமளானின் மகத்தான நாட்களை நாம் மறுமைக்கு பயனுள்ள வகையில் அமைத்துக் கொள்ள இப்போதே நாம் தயாராக‌வேண்டும். 
குறிப்பாக குடும்பத் தலைவிகளாகிய பெண்கள் மற்ற நாட்களைவிட ரமளானில் செய்யவேண்டிய அமல்களையும், தவிர்ந்துக் கொள்ள வேண்டியவற்றையும், வீட்டு வேலைகளை எவ்வாறு குறைத்துக் கொள்வது என்பது பற்றியும் சில டிப்ஸ்களை இங்கே பகிர்ந்துக் கொள்கிறேன்.
ரமளானுக்கு முன்னால் செய்யவேண்டிய....
ஸ்டோரேஜ் & க்ளீனிங் டிப்ஸ்:
o  நம் வீடுகளை எப்போதும்தான் சுத்தமாகவும், நேர்த்தியாகவும் வைத்திருக்கிறோமே என்று அலட்சியமாக இல்லாமல், ரமலானுக்கு முன்பு கொஞ்சம் ஸ்பெஷலாக எல்லாவற்றையும் ஒருகைப் பார்த்து வைத்துவிட்டால் அந்த ஒரு மாத காலத்தில் வேலைச்சுமை நிச்சயம் குறையும்.
o  எப்போதாவது எடுத்து பயன்படுத்தும் பொருட்களை எடுத்து தூசுகளின்றி சுத்தப்படுத்தி ப்ளாஸ்டிக் கவர் அல்லது கேரி பேக்கினால் மூடி வைத்தால் ரமலானில் தேவைப்படும்போது அந்தப் பொருட்களை எடுத்தவுடன் சுலபமாக பயன்படுத்தலாம்.
o  பழைய துணிமணிகளை தனியாக எடுத்துவிட்டு, பயன்படுத்தும் துணிகளை மட்டும் தனித்தனி வகைகளாக பிரித்து நேர்த்தியாக அடுக்கி வைத்துக் கொண்டால் அவசர நேரத்தில்கூட‌ தேடிக் கொண்டிருக்க வேண்டிய அவசியமில்லை. தனியாக பிரித்து வைத்த பழைய துணிகளை ஏழை எளியவர்கள் கேட்டு வரும்போது உடனுக்குடன் கொடுக்கவும் வசதியாக இருக்கும். (இது இந்தியா, இலங்கையில் உள்ளவர்களுக்கு மட்டும்.)
o  வாரம் ஒருமுறை துவைக்கும் பெட்ஷீட் செட்கள், முஸல்லா, போர்வைகளாக‌ இருந்தாலும் 4, 5 செட்களை முன்பே துவைத்து வைத்துக் கொள்ளலாம். தினமும் இரவுத் தொழுகைக்கு செல்லத் தேவையான (ஒன்றுக்கு மேற்பட்ட ) ஃபர்தா செட்களையும் ரெடி பண்ணி வைத்துக் கொள்வது நல்லது.
o  ஃபிரிஜ்ஜில் உள்ள பொருட்களை எடுத்துவிட்டு, சமையல் சோடா (சோடாப்பு) கலந்த நீரினை பழைய துணி அல்லது ஸ்பாஞ்சினால் தொட்டு உள்பக்கம் முழுதும் துடைத்துவிட்டு, மீண்டும் பொருட்களை அடுக்கி வைத்தால் ஃபிரிஜ் எந்த வாசனையுமின்றி ஃப்ரெஷ்ஷாக இருக்கும். ஃப்ரீஸரையும் அதுபோல் சுத்தப்படுத்தி கடல் உணவுகள், கறி வகைகள், காய்கறி/கீரைகள், பேஸ்ட் வகைகள் என தனித்தனியாக அடுக்கி வைத்துக் கொண்டால் தேவைப்படும்போது தேடாமல் எடுக்கலாம்.
o  நீண்ட நாட்கள் சேமித்தாலும் வீணாகாத பொருட்களான சோப்பு, ஷாம்பு, சோப்புத்தூள், க்ளீனிங் லிக்யுவிட் வகைகளை ஒரு மாத தேவைக்கும் கூடுதலாக ரமலானுக்கு முன்பே வாங்கி வைத்துக் கொள்வது நல்லது.
o  பெருநாள் புத்தாடைகள் வாங்க‌ ரமளான் தள்ளுபடி விற்பனைக்காக காத்திருந்துவிட்டு கடைசிப் பத்து நாட்களில் கடைத் தெருவில் நேரத்தை வீணாக்காமல், கூடுமானவரை உங்களுக்குத் தேவையான புத்தாடைகளை முன்பே வாங்கி வைத்துக் கொள்வது நல்லது. அதற்கு வாய்ப்பில்லாதவர்கள் மட்டும், (கடை கடையாக அலையாமல்) ஒரு இடத்தில் வாங்கினோமா, வந்தோமா என்று ஷாப்பிங்கை விரைவில் முடித்துவிட்டு வந்துவிட்டால் ரமலானின் பொன்னான பொழுதுகள் வீணாகாது.
சமையல் தயாரிப்பு டிப்ஸ்:
o  முக்கியமாக... சமையலை முன்பே முடிவு செய்துக் கொண்டு, அதற்காகவே நேரத்தை அதிகமாக செலவழிக்காத வண்ணம் திட்டமிட்டுக் கொள்ளவேண்டும்.
o  சமையலுக்கு தேவைப்படும் மசாலா, மளிகை வகைகளை மொத்தமாக வாங்கி சேமித்துவைத்துக் கொள்ளலாம். நாமே தயாரிக்கும் மசாலாக்களுக்கான பொருட்களை முற்கூட்டியே வாங்கி, சுத்தப்படுத்தி மிஷினில் கொடுத்தோ, மிக்ஸியிலோ அரைத்தோ வைத்துக் கொள்ளலாம்.
o  மல்லி, புதினா, சோற்று இலை (டவுன் பாண்டான் இலை) போன்று அடிக்கடி பயன்படுத்துபவற்றையும், நீண்ட நேரம் உட்கார்ந்து கவனமாக சுத்தம் செய்யும் முருங்கைக் கீரை போன்ற கீரை வகைகளையும் முன்கூட்டியே வாங்கி சுத்தம் செய்து தண்ணீர் படாமல் ஃப்ரீஜரில் எடுத்து வைத்துக் கொண்டால், அவ்வப்போது பயன்படுத்த மிகவும் வசதியாக இருக்கும். (குறிப்பு: இதுபோன்று தயார்படுத்தி வைத்த‌வற்றை பயன்படுத்தும் சமயம் நீண்ட நேரம் எடுத்து வெளியில் வைக்கக் கூடாது. எடுத்தவுடனே கழுவி, உடனே பயன்படுத்திவிடவேண்டும்.)
o  வாழைப்பூவைக்கூட இந்த முறையில் செய்து வைக்கலாம். ஆனால் உப்பு நீரில் சிறிது போட்டு, பிறகு தண்ணீரை வடியவிட்டு எடுத்து வைக்கவேண்டும். இதை எடுத்தவுடன் அப்படியே பயன்படுத்தலாம். காளிஃபிளவர், காளான் போன்ற காய்கறி வகைகளையும் சுத்தப்படுத்தி, நறுக்கி வைத்துக் கொள்ளலாம்.
o  எப்போதும் பயன்படுத்தும் பாத்திரங்களைவிட சில ஸ்பெஷல் பாத்திரங்கள் ரமலானில் தேவைப்படலாம். அதுபோன்ற பிரத்யேக பொருட்களை எடுத்து பயன்படுத்துபோது அதிகம் தேவைப்படாத மற்ற பொருட்களை எடுத்து உள்ளே வைத்துவிடலாம். பாத்திரம் கழுவ அதிகமாக சேர்ந்து போகாமல் இருக்கும்.
o  இஞ்சி பூண்டு விழுதினை அவரவர் குடும்ப செலவினத்திற்கேற்ற அளவில் கூடுதலாக‌ அரைத்து, அத்துடன் அரைக்கும்போதே சிறிது எண்ணெய் கலந்து கண்ணாடி பாட்டிலில் சேமித்து வைத்துக் கொண்டால் மிகவும் உபயோகமாக இருக்கும். (குறிப்பு: இஞ்சி பூண்டு விழுதை கண்ணாடி பாட்டிலில் மட்டும்தான் சேமிக்கவேண்டும். ப்ளாஸ்டிக், மற்றும் உலோகப் பொருட்களில் சேமித்து வைப்பது ஆரோக்கியத்துக்கு நல்லதல்ல.)
o  ரமளானில் இஃப்தார் (நோன்பு திறக்கும்) சமயத்தில் மிக முக்கிய உணவாக இடம்பெறுவது நோன்புக் கஞ்சிதான். இது சத்தானதாகவும், மிகவும் சுலபமாக செரிமாணமாகக் கூடியதாகவும் இருப்பதால் அநேகமான நாடுகளில் (அந்தந்த நாட்டு உணவு முறைகளுக்கேற்ப) கஞ்சியை தயார் பண்ணிக் கொள்கிறார்கள். இதை தயாரிக்க‌ சற்று கூடுதல் நேரமாகும் என்பதால் 3 நாட்களுக்கு ஒருமுறை தயாரித்து, பால் வகைகள் மட்டும் சேர்க்காமல் ஃபிரிஜ்ஜில் வைத்துக் கொண்டால் நேரம் மிச்சமாகும். (குறிப்பு: மறுநாள் தேவைக்குரியதை மட்டும் எடுத்து தண்ணீரும் பாலும் கலந்து கொதிக்க வைத்து, கட்டியில்லாமல் கலக்கி வைத்துக் கொண்டால் புதிய கஞ்சிபோல் ஃபிரஷ்ஷாக இருக்கும்.)
o  கஞ்சிக்கு தேவையான வெந்தயம், கடலை அல்லது பருப்பு வகைகளை (ஒரு வாரத்திற்கு தேவையான அளவினை) தனித்தனி பாட்டில்களில் போட்டு தண்ணீர் ஊற்றி ஊறவைத்து ஃபிரிஜ்ஜில் வைத்துக் கொண்டால், பயன்படுத்த வசதியாக இருக்கும். அவை தீர்ந்த பிறகு மீண்டும் அதுபோல் ஊறவைத்துக் கொள்ளலாம். (குறிப்பு: அதுபோல் பயன்படுத்தும்போது ஊறிய தண்ணீருடன் கலக்கி எடுத்து பயன்படுத்தவேண்டும். தண்ணீரை கீழே ஊற்றக்கூடாது.)
o  கறி வகைகளை தினமும் சென்று வாங்கிக் கொண்டிருக்காமல், கொஞ்சம் கூடுதலாக வாங்கி சுத்தப்படுத்தி, தேவைக்கேற்ப தனித்தனி பாக்கெட்களில் போட்டு ஃப்ரீஜரில் (வாரம் ஒருமுறை) ஸ்டோர் பண்ணிக் கொள்ளலாம். வெளிநாடுகளில் வசிப்போர் மொத்தமாக ஒரு மாதத்துக்கும் சேர்த்து வாங்கும் வாய்ப்புகள் இருப்பதால் அதுவே நல்லது. அதன்மூலம் அலைச்சலைக் குறைத்து நேரத்தை மிச்சப்படுத்தலாம்.
o  சமோசா, நேம், ஸ்பிரிங் ரோல் வகைகளை இப்போதே தயாரித்து, ஃப்ரோஜன் பேக் அல்லது ப்ளாஸ்டிக் பாக்ஸ்களில் அடுக்கி ஃபிரீஜரில் வைத்துக் கொள்ளலாம். (குறிப்பு: ஒவ்வொரு லேயருக்கிடையிலும் Cling Film (ப்ளாஸ்டிக் ராப்) போட்டுக் கொண்டால் ஒன்றுக்கொன்று ஒட்டிக்கொள்ளாமல் இருக்கும்.)
o  எலுமிச்சைப் பழங்களைப் பிழிந்து சாறு எடுத்து, அத்துடன் ஐஸிங் சுகர் சேர்த்து நன்கு கரைத்து ஐஸ் க்யூப் ட்ரேக்களில் ஊற்றி ஃப்ரீஜ் செய்து, உறைந்த பிறகு எடுத்து ஒரு பாக்ஸில் போட்டு ஃப்ரீஜரில் வைத்துக் கொண்டால் லெமன் ஜூஸ் கரைக்கும்போது 3/4 க்ளாஸ் தண்ணீரில் ஒரு கட்டி ஜூஸ் (அல்லது உங்கள் சுவைக்கேற்ப ) கலந்துக் கொண்டால் (Preservative கலக்காத) ஃப்ரெஷ் லெமன் ஜூஸ் ரெடி!
o  தேங்காயைக் கூடுதலாக அரைத்து ஐஸ் க்யூப் ட்ரேக்களில் நிரப்பி, உறைந்த பிறகு எடுத்து ஃப்ரோஜன் பேக்கில் போட்டு வைத்துக் கொண்டால் அவ்வப்போது பயன்படுத்த மிகவும் வசதியாக இருக்கும். அதுபோல் தேங்காய் பாலையும் தயார் பண்ணி வைக்கலாம். தேங்காயைத் திருவியும் சிறு சிறு பாக்கெட்களில் போட்டு வைத்துக் கொண்டால் தேவைக்கு ஒன்றாக எடுத்துக் கொள்ளலாம்.
o  பழவகைகளை வெட்டி ஃப்ரீஜரில் வைத்துக் கொண்டால் உடனுக்குடன் ஃப்ரூட் சாலட், ஃப்ரூட் ட்ரை ஃபில் போன்றவை செய்ய உதவியாக இருக்கும். (குறிப்பு: அப்படி உறைய வைக்கும் பழங்களை முன்கூட்டியே வெளியில் எடுத்து வைக்கக் கூடாது. தண்ணீர் விட்டுப் போய்விடும். அதனால் தயார் பண்ணி சுமார் 1/2 மணி நேரத்தில் சாப்பிடும்படி இருக்கவேண்டும்)
o  ஸஹர் உணவுகளை நோன்பு திறக்கும் முன்பே தயார் செய்துவிட்டால் இரவுத் தொழுகைக்கு சரியான நேரத்தில் செல்லவும், ஸஹருக்குரிய நேரத்தில் அசதியின்றி சுறுசுறுப்பாக எழவும் வசதியாக இருக்கும். சமையலறையில் அதிகமான நேரத்தை செலவிடாமல் ஒரே நேரத்தில் இரண்டு வேலைகளுக்கான உணவுளையும் தயாரித்துவிடும்போது, மீதியுள்ள இரவு நேரங்களில் வணக்க வழிபாடுகளில் ஈடுபட நிறைய நேரம் கிடைக்கும்.
o  ஒரே நாளில் பலவகை உணவுகளை தயாரிப்பதை தவிர்ந்துக் கொள்ள வேண்டும். அதனால் சமையலுக்கான நேரம் மிகுதியாக செலவாவதைத் தவிர்க்கலாம்.
ஆரோக்கிய டிப்ஸ்:
o  உஷ்ணமான நாடுகளில் வசிப்போர் குளிர்ச்சி தரும் பொருட்களான பாதாம் பிசின், சப்ஜா விதைகள், நன்னாரி, கடல்பாசி, பனை நுங்கு போன்றவற்றை ஷர்பத்தாக செய்து அருந்த‌லாம். மற்றும் பழ வகைகள், பழ ஜூஸ்கள், மில்க் ஷேக் போன்ற ஏதாவது ஒன்றை இஃப்தார் உணவில் சேர்த்துக் கொள்வது நல்லது.
o  ஸஹர் உணவுடனோ/உணவுக்குப் பிறகோ கெட்டித் தயிர் 1 கப் சுமார் (200 மில்லி) அளவு சாப்பிட்டால், இரவு கண் விழிப்பதாலும் சீதோஷ்ண நிலைகளாலும் ஏற்படும் உஷ்ணத்தை வெகுவாகக் குறைக்கும். உணவுண்ட பிறகு சாப்பிடுவது அல்சர், நெஞ்சு எரிச்சல் உள்ளவர்களுக்கு அருமருந்தாகும்.
o  குளிர்ச்சி தரும் பழங்களான தர்பூசணி, பன்னீர் திராட்சை, மங்குஸ்தான் பழம், ஆரஞ்சு, ஆத்தாப் பழம், ரம்புதான் பழம், செவ்வாழை இதுபோன்ற வகைகளில் எது கிடைக்கிறதோ அவற்றை இஃப்தார் உணவில் சேர்த்துக் கொள்ளலாம். வெள்ளரிப் பிஞ்சு சாலட் செய்தும் சாப்பிடலாம்.
o  ஸஹர் உணவில் கடல் உணவுகளான மீன், இறால் சமைப்பவர்கள் 1/2 ஸ்பூன் இஞ்சி பூண்டு விழுது சேர்த்துக் கொண்டால் ஸ்மெல் இருக்காது. அத்துடன் புளிக்கு பதிலாக எலுமிச்சைச் சாறு சேர்ப்பது நல்லது.
o  நிறைந்த சத்துக்களைத் தரக்கூடிய பேரீத்த பழங்களை இஃப்தாரின்போது முடிந்தவரை கண்டிப்பாக சேர்த்துக் கொள்வது நல்லது.
o  எண்ணெயில் முக்கிப் பொரிக்கும் (Deep Fry) வகை உணவுகளைக் குறைத்துக் கொண்டு அவித்த உணவுகள், கஞ்சி வகைகள் மற்றும் பழங்களை தேவைக்கு தகுந்த விகிதத்தில் சாப்பிடலாம்.
o  சஹர் நேர உணவுகளை மசாலா, எண்ணெய், நெய், காரம், புளிப்பு போன்றவை அதிகம் சேர்க்காத வகையிலும், முடிந்தவரை குறைவாகவும் சாப்பிடுவது நல்லது.
o  நோன்பு வைத்தால் விடிந்தபிறகு சிலருக்கு தலைவலி வந்துவிடும். அவர்கள் ஸஹர் உணவுக்குப் பின் ஒரு கப் சூடான டீ (பால் கலந்தோ/கலக்காமலோ) அருந்தினால் தலைவலி பெரும்பாலும் வராது. ஆரோக்கியம் தரக்கூடிய லெமன் க்ராஸ் கிரீன் டீ கூட‌ அருந்தலாம்.
நன்மைகளைத் தேடிக்கொள்ள டிப்ஸ்:
o  என்னதான் முன்னேற்பாடுகளுடன் நாம் தயாராக இருந்தாலும் அதையும் மீறி அன்றாட வேலைகள் இருக்கதான் செய்யும். அப்படி தவிர்க்க முடியாத வேலைகளில் ஈடுபடும்போது வேலை செய்துக்கொண்டே திக்ரு, தஸ்பீஹ், ஸலவாத்களை சொல்லிக் கொண்டிருக்க‌லாம்.
o  இரவுத் தொழுகைக்கு தக்க துணையுடன் பாதுகாப்பான சூழ்நிலையில் சென்றுவர வாய்ப்புள்ள சகோதரிகள் இயன்றவரை பள்ளிக்கு சென்று ஜமாஅத்துடன் தொழுவதை வழக்கமாக்கிக் கொள்ளவேண்டும்.
o  சப்தங்கள் இல்லாத அமைதியான சூழல் கிடைக்கும்போதெல்லாம் திருக்குர்ஆனின் சிறிய/பெரிய சூராக்களை மனனம் செய்யலாம். அல்லது ஏற்கனவே மனனம் செய்து மறந்திருந்தால் மீண்டும் நினைவுபடுத்திக் கொள்ளலாம்.
o  இரவு நேரங்களில் தனிமையில் அமர்ந்து அதிகமாக துஆ செய்யலாம்.
o  அவரவர் குர்ஆன் ஓதும் வேகத்துக்கு தகுந்தமாதிரி ஒருநாளைக்கு இத்தனை ஜுஸ்உ என்று திட்டமிட்டு குறிப்பிட்ட நாட்களில் திருக்குர்ஆனை ஓதி முடித்தால் அதிகமான நாட்களுக்கு நீட்டிக்காமல், லைலத்துல் கத்ரு வரக்கூடிய‌ கடைசிப் பத்து நாட்களுக்கு முன்பே ஒருமுறையோ/இரண்டு முறைகளோ குர்ஆனை ஓதி முடித்துவிடலாம். இயன்றால் மீண்டும் கடைசிப் பத்தில் புதிதாகவும் ஓதத் துவங்கலாம்.
o  6 வயதுக்கு மேற்பட்ட குழந்தைகளை நோன்பு நோற்கவும், 5 வேளைத் தொழுகை உட்பட சிறு சிறு அமல்களைச் செய்யவும் ஆர்வத்தைத் தூண்டுவதோடு, டிவி/கேம்ஸ்/இணையம் போன்றவற்றில் அவர்கள் டைம் பாஸ் பண்ணக்கூடிய மாதம் இதுவல்ல என்பதை அவர்களுக்கு புரியவைத்து, நம்முடன் சேர்ந்து அவர்களும் நன்மைகளைச் செய்யும் வகையில் அவர்களைக் கண்காணிக்கவேண்டும்.
o  வெள்ளிக் கிழமைகளில் அதிகமாக ஓதும் ஸலவாத்தினை ரமளானின் வெள்ளிக் கிழமைகளிலும் அதிகமாக்கிக் கொள்ளுங்கள்.
o  வெளியூரிலிருந்து நம்மைத் தேடி வரக்கூடிய மக்களுக்கோ, வீடு தேடிவரும் ஏழைகளுக்கோ, உறவினர்கள்/நண்பர்களுக்கோ நோன்பு திறக்கும் இஃப்தார் மற்றும் ஸஹர் உணவு ஏற்பாடு செய்து கொடுப்பது நன்மையான விஷயமே! ஆனால் சிலர் இஃப்தாருக்கென்றே பெரிய ஏற்பாடுகளைச் செய்து விருந்துக்கு மற்றவர்களை அழைப்பார்கள். அதற்காக‌ அன்றைய பொழுது முழுவதும் சமையல் அறையில் அவர்கள் செலவழித்துக் கொண்டிருப்பார்கள். இது தேவையற்ற/தவிர்ந்துக் கொள்ளவேண்டிய ஒன்று! (எல்லோரும் கூடி செய்யக்கூடிய, பொது இஃப்தார் நிகழ்ச்சிகள் என்றால் அது யாருடைய அமல்களையும் வீணாக்காது)
o  தூங்கி எழுந்தது முதல் இரவு படுக்கச் செல்லும் முன் வரை ஒவ்வொரு நிலையிலும் ஓதவேண்டிய துஆக்களை அவ்வப்போது மறக்காமல் ஓதிக் கொள்ளுங்கள்.
o  நம்மால் இயன்றவரை அதிகமாக‌ ஸதகா (தர்மம்) செய்யவேண்டும். நாம் செய்யும் தர்மம் இஸ்லாம் காட்டிய முறையில் இருக்கவேண்டும். (சிலர் ஜ‌காத்தும் ஸதகாவும் ஒன்று என தவறாக விளங்கி வைத்துள்ளனர். இரண்டுக்குமுள்ள வித்தியாசங்களை பார்க்கவும்.)
o  அக்கம் பக்கத்தில் கூடிப் பேசி நேரத்தைக் கழிப்பது, விவாதங்கள்/தர்க்கங்கள், தொலைக் காட்சி நிகழ்ச்சிகளில் பொழுதை ஓட்டுவது, அவசியத் தேவையின்றி இணையத்தில் நேரம் செலவழிப்பது போன்றவற்றைக் கண்டிப்பாக தவிர்க்கவேண்டும். இயன்றவரை தொலைப்பேசியின் மூலமும்கூட வீணான பேச்சுக்களை பேசுவதைக் தவிர்ந்துக் கொள்ள‌வேண்டும். நோன்பின் நோக்கம் நிறைவேறும்படி நம் அமல்களை அமைத்துக் கொள்ளவேண்டும்.
o  ரமளானின் ஆரம்ப நாட்களின் இரவுகளைவிட கடைசிப் பத்து நாட்களின் இரவுகள் மிகவும் சிறப்பும், முக்கியத்துவமும் வாய்ந்ததாக இருப்பதால் இயன்றவரை இரவில் கண்விழித்து அமல்களைச் செய்ய முயற்சி செய்யவேண்டும். சில நேரங்களில் நம்மையும் மீறி தூக்கம் மேலிடும். அதுபோன்ற சமயங்களில் தையல், பின்னல் போன்ற பயனுள்ள கைவேலைப்பாடுகள் (Crafts) தெரிந்தவர்கள் அதை செய்துக் கொண்டே தூக்கத்தைக் கலைப்பதன் மூலம் தஸ்பீஹ், திக்ரு, ஸலவாத் மற்றும் கடைசிப் பத்துக்கான பிரத்யேக துஆ (“அல்லாஹும்ம இன்னக அஃபுவ்வுன், துஹிப்புல் அஃப்வ, ஃபஅஃபு அன்னீ”) போன்றவற்றை ஓதலாம்.
அல்லாஹுதஆலா நம் அனைவருக்கும் ஆரோக்கியமான உடல்நிலையுடன் ரமலான் நோன்புகளை நோற்கவும், அதிகமதிகமான நல்ல அமல்களை செய்து மறுமையில் அதன் முழு பலனை அடையவும் நல்லருள் புரிவானாக!

கட்டுரை

MKRdezign

Contact Form

Name

Email *

Message *

Powered by Blogger.
Javascript DisablePlease Enable Javascript To See All Widget